مدونة حرية

من سنة
ملت العساكر حيّنا
أخدوا أبونا وفرحنا
من وسطنا
من غير سبب ... يال العجب

لكنّنا ... واقفين هنا
بنقول هنا...
كلام لوجه ربنا
علشان نرجع حقنا
وأبونا يجى عندنا .. ويضمّنا
لكن القضاء فى أرضنا
خايف يقول .. كلمة صريحة فى حقنا
سايب الشهود بيزورا
كل الأدلة ضدنا!!
بيزيفوا كل الكلام
قاصدين يضيع ليه حقنا؟
أحراز كتير بيلفقوا
واخدين فلوسنا كلنا!!

وفى يوم قالولنا المحكمة
قالت خلاص إفراج لنا
وأبونا حتماً بالقانون
بكره هيرجع حيّنا
لكن فوجئنا كلنا
إن القرار كان على الورق
وسئلنا حد يقولنا
ليه القرار بيبدلوه
ويحولوا كل الورق
عالعسكرية يوجهوه
بيزودوا ليه القلق ؟

وسألت أمى تقولنا
... إيه السبب ؟
عالعسكرية محولين
ليه الورق ؟

قالتلى يا بنى إكمننا
إخوان ونعرف ربنا
والشعب عارف إننا
متمسكين بشرعنا
علشان كدا بيحبنا
وفى الانتخاب
على طول بيجى فى صفنا
علشان كدا ...
علشان كدا .. عايزين يخلوا شعبنا
يخاف ويبعد عننا
ويهج ويسيب أرضنا

لكننا .... صابرين وعارفين ربنا
صابرين ... ومش بيهمنا
وإن كانوا فاكرين إننا
هنمشى ونسيب أرضنا
زى الى سرقوا شعبنا
أو غرقوه بالعبّارات
فى البحر برضك من سنه
أو أكلو كل الغلابة
حاجات كتير بترضنا
أوفى العلاج راحوا اشتروا
أكياس تلوث دمنا
والغاز كدا بيصدروه
ببلاش على عشرين سنة
علشان صهاينة بيشتروه
ويغلو ليه على شعبنا

لكننا .. رغم الفساد
الى عمّ بأرضنا
بلدنا برضه تهمنا
بلدنا جوه فى قلبنا
ولا يوم محاكم أو سجون ... بتهزنا
ولا ألف مليون عسكرى
خلونا نرحل من هنا
ولا يوم هنرجع عن طريق
رسلونا فيه القدوة لنا
ولو السجون متفتحة وبتلمّنا
برضه ما عدش يهمّنا
هنجدد البيعة قوام
للبنا راسم دربنا
وشعارنا قرآن ربنا
والله غايتنا وحسبنا
وبدام إيمانّا بربنا
وقلبنا على بعضنا
نرفع إيدينا كلنا
ندعيه يفرج كربنا
وأبونا يرجع حيّنا

ومن سنة
ملت العساكر حيّنا..
أخدوا أبونا وفرحنا
من وسطنا
ياللى سكتوا ومن زمان ... قاعدين هنا
فى حيّنا
ما تيجوا تقفوا فى صفّنا
طالبوا معانا بحقّنا
جنب الحيطان ... ليه مشينا
لو سكتّوا .. لما يضيع حقنا
بكره العساكر راح تزوركم زينا
طول السنة