تخاريف الهايكستب

تخاريف الهايكستب

أرسل أحد قراء المدونة مشاركة .. بعد حضوره فى المحاكمة الهزلية فى منطقة الهايكستب ..

فكان كلامه معبراً عن ما حدث ويحدث فى هذه المسرحية المسماة بالمحكمة العسكرية .

تخاريف الهايكستب

فى صحراء الهايكستب
تسمع صوت النملة تدب
موجة الحر عليك بتهب
أمن يفتش فين ما يحب
جوه الجزمة بكعب كرب
حتى الأكل وقرطاس لب
كلب بوليسى عليك بيشب

فى صحراء الهايكستوس
صف عساكر هنا مرصوص
قولت عشان هجموا الهكسوس
ولا عشان الشعب يبوس
رجله عظمته بوجه عبوس
بعد ما أكل الفول أبو سوس
هس يا واد لتبات محبوس

فى صحراء الهايكستاس
قلت أعوذ برب الناس
من أفراد ملهاش إحساس
واقفة كدا زى البلاص
ملهاش رأى كما النسناس
كله تمام من غير أنفاس
بعد شوية دخلنا خلاص

فى صحراء الهايكستان
خدت حبايبى بالأحضان
قاعة الحكم دخلنا كمان
قولت يا واد لتكون غلطان
على الأبواب ألفين سجان
محكمة دى ولا ليمان
حتى القاضى كلامه جنان
قولت أكيد داسمه مروستان

فى صحراء الهايكستون
صاحب الحق يبات مسجون
جوه اقفاص ما تقولش حصون
كله بلون أسود مدهون
أسود لون عهده الميمون
لجل الكرسى لابنه يكون
كله عشان إسلامنا يهون


فى صحراء الهايكستاح
قاضى ضميره مات وارتاح
حتى فلوسنا بكلمة أباح
حتى حراسة وحكم سلاح
رغم عذاب وآلام وجراح
الحرية والإصلاح
برضه طريقنا مسى وصباح

فى صحراء الهايكستب
ضحى لدينك زى ما تحب
سيبك ملى نفسه يقب
فوق الكرسى ابنه يشب
وبرجليه عالشعب يدب
لكن صوت الحق يهب
ربك ينصر الى يحب